Kútmagarnir látnir á bréf og nuddaðir úr grófu salti eða sandi. Allar himnur reyttar af, snúið við, skafið báðum megin og burstaðir vel úr köldi vatni. Gott er að láta þá bíða í 5-10 mín. með grófu salti, því að það losar slímið. Skafið vel, en gætið þess að hafa hnífinn ekki of beittan. Skolið vandlega utan og innan úr rennandi köldu vatni.
Lifrin er lögð í kalt vatn um stund, himnan tekin burt og salti stráð á. Kútmagarnir hálffylltir af lifur of bundið fyrir þá. Látnir í sjóðandi vatn með salti og pikkaðir, þegar suðan kemur upp. Soðnir í 3-4 stundarfjórðunga. Bezt er að sjóða kútmaga, a. m. k. fyrst, í loklausum potti. Rúgmjöli má blanda sman við lifrina. Er þá látið heldur minna í kútmagana, en þeir verða að sjóða miklu lengur. Þegar fært er upp úr, er það efsta skorið af kútmögunum og spottunum fleygt. Borðaðir með heitum kartöflum.
Kútmaga má sjóða án lifrar og borða heita, kalda eða súrsaða. Áður fyrr voru kútmagar oft hertir og steiktir á glóð.

Matur og drykkur, Helga Sigurðardóttir, Reykjavík 1991
Bókina er væntanlega hægt að nálgast í verslunum Máls og Menningar.