15.000 gr. (15 kg) tröllasúra (rabarbari),
1500 gr. þrúgur (rúsínur),
50.000 (50 l) vatn,
20 gr. matarlím,
14.000 gr. (14 kg) sykur),
hýði af 3 glóaldin (appelsínum).

Tröllasúran er þvegin, þurkuð og skorin í litla bita. Þrúgurnar eru þvegnar og saxaðar gróft. Þetta hvort tveggja er svo látið í vel hreinan trébala og hellt yfir 25 lítrum af vatninu, sem tiltekið er. Vatnið má ekki vera meira en sem svarar 2/3 af stærð balans, því að þegar tröllasúran fer að gerast, hækkar í balanum. Balin er látinn vera á volgum stað 20-25 daga og er byrgður vel. Einu sinni á dag er hrært vel innan um balan. Þá er seyðið af þrúgunum og tröllasúrunni síða í annan bala. Vatninu, sem eftir var, 25 l. er hellt yfir þrúgurnar og tröllasúruna, látið svo standa 10 daga og farið alveg eins og áður var sagt. Þá er það síað saman við fyrra seyðið og sykurinn látinn í. Þegar hann er runninn, er seyðið síað í vel hreint kvartil eða kút, sem svo er látinn liggja á hliðinni í kjallara við 14-15 gráðu hita C., svo að geringin gangi fljótar. Einu sinni á dag þarf að hræra innan um kvartilið með priki gegnum tappagatið, sem haft er opið. Eftir 8 daga er matarlímið leyst upp í 150 gr. af heitu vatni, glóaldinhýðið er saxað örsmátt og þetta hvort tveggja látið í kvartilið. Eftir 4-6 vikur, þegar ólgan fer að minnka, eða helst að froðan sé horfin, er 5 lítrum av vatni smáhellt í kvartilið. Þetta má gera síðustu vikuna. Þá er vel hreinn og soðinn tappi látinn í og gifsað eða lakkað yfir og kvartilið liggja hreifingarlaust 4-6 mánuði. Þá er vínið látið á flöskur gegnum trékrana, hreinn og soðinn tappi látinn í flöskurnar og þær geymdar á góðum stað. Vínið verður betra eftir því sem það verður eldra, helst nokkurra ára.

(Hallgerður Gísladóttir, Íslensk matarhefð, Reykjavík, 1999)