Fyrst er fiskurinn þveginn vel, síðan skorinn í lengjur og lagður í trog og stráð á hann salti. Þannig er hann svo látinn liggja í 12 til 16 tíma, snúið svo við og saltaður hinum megin og enn þá látinn liggja aðra 12 tíma. Því næst skal bundið seglgarni um annan endan á lengjunum og hengja þær upp í reyk. Rafabeltin eru helst tekin til að reykja, og höfð þá eins og söltuð síld ofan á brauð. Best er að reykja með einirberjalyngi, en þess skal gætt að reykurinn sé kaldur, því annars er hætt við, að fitan renni úr og fiskurinn þránni.

(Hallgerður Gísladóttir, Íslensk matarhefð, Reykjavík, 1999)